السلام عليكم ورحمة الله وبركاته


امل ان يكون الجميع بخير وصحه وسلامه



اخواني قصص قبيلتنا كثيره وعجيبه وبطوليه والفضل والمنه لله وحده وانا ما اقول نحن انفردنا بالطيب عن غيرنا لا حشاء فكل قبيله اخذه نصيبها .


اخواني اليوم لدي قصه بطوليه جديده وليست قديمه وصاحبها مازال حياً يرزق اسئل الله ان يختم له بخاتمت خير

هذا الله يسلمكم
عبيد ابن عبدالله الحيسوني الحربي
كان يوماً من الايام وارد على وايت ابله بنفود الجوف ويقول يوم قطعت اول عرق واذا بامراءه وثلاث بنيات بالخلاء
وبيتهم طايح وعندهم بعير بارك وحاط ارقبة على جهته اليمين وميت على محله يقول شدني منظر حالتهم وميلت عليهم
وسلمت على المرءه ونشدتها عسى ماشر وش العلم
فاأجابت ماش علوم شوفت عينك
زوجي راح الله لايرده ورى بعارينه له اليوم خامس يوم وحنا على هالحاله
يقول قلت انا ابروح ارد واذا صدرت ابمرك اذا ماجاك احد اسنعك انشاء الله
يقول وكان معي بالموتر اكل نزلته عندها قبل امشي
ومشيت وردت وعندما رجعت لقيتها هي وبناتها على حالتهن
قلت وش الراي قالت ماعندي رايي
يقول قلت اركبي اركبي انتي وبناتك وانا ابشيل باقي عفشكم
يقول اخذت الخفيف من العفش وثلاث معزاء منقطعه
ومشيت يقول يوم جيت اهلي دون طويل الجوف
قلت لأحد الحريم اطلعي من بيتك ولاتاخذين شي
طبعاً عبيد هذا عنده مرتين ببيوت شعر
يقول حطيتها بالبيت عندنا وكان اسمها جوزاء الشمريه
وقال لأهله وعياله ياويل اللي يقول لها الشمريه
نادوها بجوزاء فقط
يقول اخذت اربع ايام ورحت ادور رجالها
من ديره لديره اقصه بالحشو الميت من الجوع
يقول لين لحقته على حد العراق
يقول قلت له يارجل انت علامك مخلي ورعانك وزرجتك
ورايح
يقول قالي هم شاكين عليك فقرهم
يقول قلت الله يفقرك ارح على فالك واذا بغيت
ورعانك انشد عني انا عبيد عبدالله الحيسوني الحربي
اطرف حربي يعلمك في
يقول مشيت منه
ورجعت لأهلي وشدينا ونزلنا على مدرج صارت هالشمريه مثل اختي
هي وبنياتها وفي يوم من الايام
جتني وقالت لي ياعبيد ابي منك حاجه يقول قلت وشي قالت ابوي
عمير الوبير الشمري ساكن دون حايل ابي يصير عنده مني خبرا
يقول قلت خير واخذعنوانه
ويوم اصبحت مشيت يقول يوم جيته قلت انت عمير قال نعم قلت انا مرسلني عليك عبيد عبدالله الحيسوني الحربي
ويقول اذا جيت عمير بالليل لايصبح الا عندي وان جيته الصباح لايمسي الا عندي
يقول ورجعت ويوم جاء الصباح لهذا عمير جايني يوم شافني قال هذا نت يقول قلت ايه
قال وراك تكذب علي وتقول انك مرسال يقول قلت اقلط واعلمك
يقول قلط عمير واخذله فنجال وقلت للورعان نادو جوزاء يقول قال عمير جوزاء وشي جوزاء
يقول قلت بنتك اللي انت مزوجها وادن غادي
يقول جت جوزاء وقعدت عند الرفه وقامت تاخذ من التراب وتحط على راسها وتقول انا ابوي عبيد انا حيي عبيد
ييقول مسكها ابوها عمير وهو يبكي معها
وقال يالله مشينا يقول وتاخذ بيتها اللي انا معطي لها ومعها 70 راس من الغنم يقول من زكاتي
يقول راحت ويوم جاء نهار الجمعه وصليت بمسجد مدرج وخلص الامام من الصلاه واذا بالشمري عمير
يصعد على المنبر ويحط اصابعه باذانيه ويقول بيض الله وجهه عبيد الحيسوني الحربي وربعه حرب
ويبيض لقبيلة حرب والاجواد ماينسون المعروف يجزونه اقل شي بمثل ماسوى الشمري
هذه قصة عبيد ابن عبدالله الحيسوني الحربي
اتمنى ان تنال اعجابكم وقد رويتها على لسانه

الموضوع الأصلي : قصة عبيد بن عبداللة الحيسوني الحربي // الكاتب: عصام